जति रमाए पनि मन अघाउदैन घान्द्रुकमा , त्यहाँ पुग्नेहरु प्राय यही भन्ने गर्छन् । कति सुन्दर छ कास्कीको पर्यटकीय गाउँ घान्द्रुक । स्वदेशी मात्र हैन धेरै विदेशी पर्यटकहरुको लागि घान्द्रुक रमणिय स्थल वनेको छ । पहिलो पटक पुग्ने मात्र हैनन् बारम्वार पुग्नेहरु पनि यसरी नै मख्ख पर्छन् यहाँको रमणियतामा लुटपुटिन पाएपछि । हो त यहाँ पुगेपछि मनै चंगा बन्छ । यहाँ पाइला राखेपछि विदेशी मात्र हैन स्वदेशीको पनि मन प्रफुल्ल हुन्छ ।

आकर्षण तवरले ढुङ्गाले कुदेर बनाइएका गुरुङ घर र अत्यन्त निकटवाट देखिने अनपूर्ण र द्यौलागिरी हिमश्रृङखलाहरुको अनुपम दृश्यहरुले जसको पनि मन पग्लिहाल्छ । सखारै उठेर जहाँवाट हेर्दा पनि हिमाल छयाङ्गै खुलेको देखिन्छ । आँखैमा टाँसिन आइपुग्ने हिमाल हेरेर कत्ति धित मदैन । जति हेरे पनि हेरु-हेरु वनाउछ । झनै जुनेली रातमा हिउँ परेको हिमाल टल्क टल्किदा आँगन्तुहरु त्यो दृश्य हेरेर अघाँउदैनन् । यही भएर त होला स्वदेशमा मात्र हैन विदेशमा पनि उतिकै लोकप्रिय वनेको छ पर्यटकीय गाउँ घान्द्रुक । कसैकसैले घान्द्रुकलाई 'पहाडकी रानी' भनेर पनि उपमा दिएका छन् । 

पुरानो मौलिकता वोकेको ढुङ्गाले कुदिएका घरहरु र सेतै हिमालहरु खुल्दा र्स्वर्गको एक हिस्सा नै भएको अनुमान लगाउन जोकोहीलाई पनि गारो पदैन । पछिल्लो समय केही घरहरु ढलान गरेर आरसीसी गर्न थालेपछि भिन्नै मौलिकता बोकेको घान्द्रुकको पहिचान घुम्ने त हैन भन्ने चिन्ता स्थानिय समाजसेवी पदमलाल गुरुङको छ । केही घरहरु यसरी वनेपनि अहिले हामीले ढलान गरेर घर बनाउन प्रतिबन्ध लगाएका छौ, गुरुङले भने-'ढुङ्गाले छाएका घरहरु घान्द्रुकबासीको परम्परागत पहिचान हो ।' यति मात्र हैन कुदेका ढुङ्गाले छापिएका सिढी नै सिढी भएको बाटोले पनि यहाँको शोभा बढाएको छ । यस्तो बाटोमा पर्यटकहरु हिडडुल गरेको  हेर्न धेरै समय देखि पाएका थिएनन् घान्द्रुकवासीले । तर हिजोआज लहरै पर्यटकहरु हिडडुल गरेको  हेर्न पाउँदा दंगदास छन् उनिहरु । पर्यटकहरु बढ्न थालेपछि जाँगर पलाएको छ घान्द्रुकवासीको ।

हाइटमा रहेकोले पनि यहाँवाट हिमाल मात्र हैन वरिपरिका डाँडापाखाहरु पनि चित्ताआकर्ष देखिन्छ । ६ हजार ७ सय फिट उचाईमा रहेको घान्द्रुक पुग्न कास्कीको नयाँपुल पुगेर मोटरवाट ओर्लेपछि करीव पाँच घण्टा पैदल हिडनुपर्छ । यो रुटवाट हिडेर घान्द्रुक पुग्न पर्यटकहरु लालयित हुने गरेका छन् । अझ यो महिनामा घान्द्रुक पुग्ने हो भने वनपाखामा फुल्ने राताम्मे गुराँसले झनै मनमोहक देखिन्छ त्यहाँको वातावरण ।

राजधानीवाट हेलिकप्टर चार्टर गरेर पनि घान्द्रुक पुग्ने गरेका छन् पर्यटकहरु । माओवादीले पर्यटकहरुवाट चन्दा उठाउन शुरु गरेपछि विरेठाटीवाट गत साल घान्द्रुक आउने पर्यटकहरु धेरै फर्कै । त्रासका कारण धेरैले घान्द्रुकको यात्रा स्थगित गरे । तर अहिले त्यो अवस्था रहेन । सवैतिर शान्तिको अनुभव हुन थालेको छ । अहिले निर्धक्क साझ सम्म पनि पर्यटकहरु हिडेर घान्द्रुक पुग्ने गरेका छन् ।मनिसा लजका डम्वर वहादुर जिसी भन्छन्-'गत सालको अनुपातमा पर्यटक आँगमनमा धेरै सुधार आएको छ ।'

फेरी पर्यटकहरुलाई आकषिर्त गर्ने वातावरण त छनै । उपयुक्त मौसम र यहाँको चिसो र मिठो पानीले क्षणभर मै तिर्खा मेट्छ । झनै गुरुङ सग्रहालय पर्यटकहरुको अर्को रोजाइ हो । यहा अति पुराना सामानहरु संग्रह गरेर राखिएको छ । यही गाउँको उचाईमा रहेको गुरुङहरुको इस्ट देवता भ्रेज मेश्रोम वराह मन्दिर अर्को आकर्षाको केन्द्र हो । यहाँवाट वरिपरिका दृश्यहरु अति नै राम्रो देखिन्छ । घान्द्रुक आफैमा छुट्टै नाम हुँदा हुदै पनि यहाँ रहेका यी यस्तै स्थलहरुले पनि यसको गरिमालाई अझै माथि उठाएको छ । यतिबेला त झन घान्द्रुकबासीलाई फुर्ति आएको छ । गाउँमा चहपहल उस्तै देखिन्छ । घान्द्रुकलाई एउटा पर्यटकीय स्थलको रुपमा अझै विस्तार गर्न सरकारले केही गर्ने पर्ने धारणा यहाँका बुद्धिजिवीहरुको छ ।